नांदेड …….. नांदेड जिल्ह्यातील पूरग्रस्तांना मदत करण्यासाठी समाजातील विविध घटक पुढे सरसावले आहेत. याच पार्श्वभूमीवर “डॉक्टर्स ग्रुप” च्या वतीने राशनच्या किट चा पहिला टेम्पो उप जिल्हाधिकारी नांदेड डॉ. सचिन खल्लाळ यांच्याकडे उपविभागीय कार्यालय, नांदेड येथे सुपूर्द करण्यात आला. पूरग्रस्तांच्या पुनर्वसनासाठी ही मदत उपयोगी ठरेल, असे यावेळी सांगण्यात आले. नैसर्गिक आपत्तीमुळे जनजीवन विस्कळीत होत असून प्रशासनासोबत सामाजिक संस्था, शैक्षणिक संस्था व नागरिकांनी मदतीचा हात पुढे करणे ही काळाची गरज असल्याचे डॉक्टर्स ग्रुप मार्फत मदत गोळा करण्यासाठी पुढाकार घेतलेले डॉ.दत्ता मोरे पाटील यांनी नमूद केले.या प्रसंगी नायब तहसीलदार सुनिल माचेवाड,डॉ. यशवंत चव्हाण,डॉ. अरुण निवळे पाटील,डॉ. सागर राहेगावकर, डॉ. चंदन धोंगडे, डॉ. सुधीर डूमणे इत्यादी मान्यवर उपस्थित होते.
पूरग्रस्तांच्या पुनर्वसनासाठी जिल्हा प्रशासन सातत्याने प्रयत्नशील असून नागरिकांनी देखील आपापल्या परीने योगदान द्यावे, असे आवाहन उपजिल्हाधिकारी डॉ. सचिन खल्लाळ यांनी केले व एका दिवसाच्या आत मी सहज केलेल्या मागणीला आणि मागणीची अत्यंत निकड लक्षात घेऊन “डॉक्टर्स ग्रुप ” ने तातडीने मदत उपलब्ध करून दिले याचं कौतुक केलं.
सदरील मदत गोदावरी नदीकाठच्या पाण्याच्या वेढा पडलेल्या ” राहेगाव ” या गावी NDRF च्या टीम सोबत बोटीद्वारे सुपूर्द करण्यात येईल असं सांगितलं. शेतकरी हा जगाचा पोशिंदा आहे, त्याने पिकवलेल्या अन्नावर आपण जगतो, तो मायबाप शेतकरी आज अडचणीत आहे तरी आपण सगळ्यांनी शेतकऱ्यांचे अन्न खाल्लेल्याला जागल पाहिजे व या संकटकाळात सर्व समाज घटकानी मदत केली पाहिजे असं सुतोवाच डॉ. अरुण निवळे यांनी केले. यावेळी डॉ. सागर राहेगावकर व डॉ. चंदन धोंगडे यांनी इतक्या तात्काळ मदत केलेल्या दात्यांचे कौतुक केले व आभार मानले. सदरील मदतीचा ओघ यापुढे ही सुरु ठेवण्याचे आवाहन केले.
